Samatta: Tutaipiku Misri

Nahodha wa Taifa Stars, Mbwana Samatta

NAHODHA wa timu ya soka ya Taifa ya Tanzania ‘Taifa Stars’, Mbwana Samatta amesema Taifa Stars bado ina nafasi ya kufuzu fainali za Afrika (Afcon) mwakani.

Katika mawasiliano na gazeti hili kwa njia ya mtandao, Samatta anayecheza klabu ya KRC Genk iliyopo Ligi Kuu ya Ubelgiji, alisema amesikia kuhusu timu ya Taifa ya Misri kushinda mchezo wake dhidi ya Nigeria juzi na hivyo kufikisha pointi saba ambazo ndizo Tanzania inaweza kuzifikia ikishinda michezo yake miwili iliyobaki.

“Nimesikia Misri imeshinda bao 1-0 na sasa wana pointi saba, ukiangalia kwa juujuu unaweza kudhani wameshafuzu, lakini kiuhalisia bado, soka haipo hivyo. “Misri watakuja Dar es Salaam tunaweza kuwafunga kama walivyotufunga kwao (Misri iliifunga Taifa Stars mabao 3-0), pia mechi yetu ya Nigeria tukishinda tutakuwa nasi na pointi saba, tutashindana tofauti ya mabao ya kufunga na kufungwa,” alisema Samatta.

Kwa upande wake Mshauri wa Benchi la Ufundi la Taifa Stars, Abdallah Kibadeni, amesema Stars bado ina nafasi na kwamba matokeo ya Misri yasiwakatishe tamaa mashabiki.

Naye kocha wa zamani wa Ndanda FC ya Mtwara iliyopo Ligi Kuu Tanzania Bara, Ngawina Ngawina amesema mpira unadunda na kwamba dakika 90 za mchezo ndiyo zitaamua, hivyo Taifa Stars inaweza ikashinda mechi mbili ilizo nazo na ikafikisha pointi saba.

“Tuwape nafasi, tuwatie moyo wachezaji nina hakika tutafanikiwa. Fainali yetu ni Juni hapa wakija Misri tuwapige mabao mengi,” alisema.

Ngawina ambaye amepata kuchezea TP Mazembe ya Jamhuri ya Kidemokrasia ya Congo (DRC). Juzi Misri iliibuka na ushindi wa bao 1-0 dhidi ya Nigeria bao lililofungwa na Ramadan Sobhi Uwanja wa Borg El Arab mjini Cairo

Kutokana na matokeo hayo, Misri inaongoza Kundi G ikiwa na pointi saba ikifuatiwa na Nigeria yenye pointi mbili na Tanzania inashika nafasi ya mwisho ikiwa na pointi moja.

Kundi hilo limebaki na timu tatu tu, baada ya Chad kujitoa mwishoni mwa wiki, ambapo timu hiyo hadi inafikia uamuzi huo ilikuwa imefungwa mechi zake zote tatu ilizocheza.

Chad ilifungwa mabao 0-1 na Misri, mabao 2-0 na Nigeria na bao 1-0 na Tanzania. Misri itacheza na Taifa Stars Juni 4, Uwanja wa Taifa, Dar es Salaam na baada ya mchezo huo, Stars itamaliza na Nigeria Septemba mwaka huu.

Yanga, Azam vitani leo

Kikosi cha Yanga

 

YANGA na Azam leo zinashuka kwenye viwanja tofauti katika michezo ya Kombe la Shirikisho hatua ya robo fainali.

Michuano hiyo inayojulikana pia kama Kombe la FA imeingia hatua ya robo fainali, ambapo Jumamosi iliyopita timu ya Mwadui iliifunga Geita Gold Uwanja wa CCM Kirumba, Mwanza mabao 3-0 na kufuzu nusu fainali.

Kwa mujibu wa ratiba iliyotolewa na Shirikisho la Soka Tanzania (TFF), Yanga itacheza Uwanja wa Taifa Dar es Salaam ikiwa mwenyeji wa Ndanda FC ya Mtwara, wakati Azam FC itakuwa Uwanja wa Azam Chamazi kuivaa Prisons.

Kombe la Shirikisho (Azam Sports Federation Cup) linatarajiwa kuendelea Alhamisi kwa michezo miwili kuchezwa katika hatua ya robo fainali ya michuano hiyo. Mechi zote zinatarajiwa kuwa na upinzani wa hali ya juu, huku kila timu ikipania kushinda na kufuzu nusu fainali.
Bingwa wa michuano hiyo atawakilisha nchi katika michuano ya Kombe la Shirikisho la Soka Afrika (CAF CC) mwaka 2017.

Yanga na Azam pia zitatumia michezo hiyo kama maandalizi yao kwa ajili ya mechi za kimataifa mwishoni mwa wiki ijayo, ambapo Azam itacheza na Esperance ya Tunisia na Yanga itacheza na Al Ahly ya Misri.

Pia mechi ya leo ni maandalizi ya michezo ya viporo vya Ligi Kuu Tanzania Bara, ambapo Yanga na Azam zitacheza kuanzia Jumamosi wiki hii. Robo fainali nyingine ya michuano hiyo itakuwa Aprili 9 mwaka huu, wakati Simba itakapokuwa mwenyeji wa Coastal Union ya Tanga Uwanja wa Taifa, Dar es Salaam.

Wengine wakamatwa sakata la tumbili

Kamanda wa Polisi Mkoa wa Kilimanjaro, Wilbroad Mtafungwa

SAKATA la kukamatwa kwa tumbili waliokuwa mbioni kusafirishwa nje ya nchi, limechukua sura mpya baada ya idadi ya waliokamatwa mpaka sasa kufikia watu saba wakiwemo maofisa wanne wa serikali.

Miongoni mwa waliokamatwa ni Ofisa Mfawidhi Kanda ya Kaskazini anayehusika na Matumizi Endelevu ya Wanyamapori nchini Nyangabo Musika, Idd Misanya anayedaiwa kuwauzia wanyama hao.

Akizungumza na gazeti hili juzi, Kamanda wa Polisi Mkoa wa Kilimanjaro, Wilbroad Mtafungwa aliwataja watu hao kuwa ni Juma Eliasa ambaye ni Mkurugenzi wa Manyara Bird wakiunganishwa na raia wa Uholanzi waliokamatwa mwishoni mwa wiki kwenye Uwanja wa Ndege wa Kimataifa wa Kilimanjaro (KIA, Arten Vardanian (52) na Edward Vardanian (46).

“Tumewakamata watu hawa na bado tunaendelea na mahojiano zaidi, uchunguzi utakapokamilika tutawafikisha mahakamani,” alisema Kamanda Mtafungwa.

Wakati kamatakamata hiyo ikiendelea, wafanyabiashara wanaohusika na uwindaji wa wanyama hao wanalalamikia kitendo cha kukamatwa kwa wageni hao kuwa kitaathiri biashara yao hiyo.

Akizungumza na waandishi wa habari, Mwenyekiti wa Chama cha Wasafirishaji Nyara Kanda ya Kaskazini (TWEA), Athumani Bhoki alisema kuna mahala huenda waziri amepotoshwa kwani biashara hiyo ni halali na ina vibali vyote halali.

“Sisi hapa tuna vibali vilivyoidhinishwa kwa msimu aina ya wanyama na idadi yake kwa kampuni yangu ikiainishwa na ada ya malipo kwa serikali,” alisema Bhoki.

Alifafanua kuwa kwa tukio hilo litawashtua wateja wao wote kuwasiliana nao kwa ajili ya ununuzi wa wanyama hao kwa mwaka huu na kuwatia hasara kwani tayari wana idadi ya wanyama i wanawahifadhi na kuwatunza kwa ajili ya kupata masoko.

Naye Katibu wa chama hicho, Anthony Mushi alisema kwa tukio hilo, yeye tayari ana hasara kubwa kwani Waholanzi hao alikuwa na mkataba wa kuwauzia tumbili zaidi ya 174.

Aidha, alisema katika makubaliano hayo, baada ya mwezi mmoja wangefuata tena wanyama aina ya kima na tumbili zaidi ya 300 kwa kutumia usafiri wao ambayo ni fursa kubwa kibiashara.

Marekebisho sheria ya manunuzi kukabidhiwa Mwakyembe leo

Waziri wa Sheria na Katiba, Dk Harrison Mwakyembe.

TUME ya Kurekebisha Sheria Tanzania leo itakabidhi taarifa ya utafiti wa Sheria ya Ununuzi wa Umma ya mwaka 2011, Sura ya 410 kwa Waziri wa Katiba na Sheria, Dk Harrison Mwakyembe. Utafiti huo ulifanywa na Tume kwa kuzingatia masharti ya Kifungu cha 8(1) na (2) cha Sheria ya Tume ya Kurekebisha Sheria.

Ofisa Habari wa Tume hiyo, Munir Shemweta alisema mbali ya masharti ya kifungu hicho, pia taarifa hiyo ina hadidu za rejea zilizotolewa na Mwanasheria Mkuu wa Serikali ambapo aliitaka Tume kubainisha upungufu katika utekelezaji wa sheria na kubainisha madhara ya upungufu huo katika utekelezaji kwa serikali na taasisi zake.

Shemweta alisema katika utafiti Tume ilikutana na wadau mbalimbali kutoka Wizara, Idara,Taasisi mbalimbali za serikali na zisizo za kiserikali wakiwemo watalaamu waliobobea katika masuala ya ununuzi wa umma. Alisema taarifa ya Tume ina mapendekezo ya namna ya kuiboresha sheria hiyo ili ilete tija zaidi katika sekta ya ununuzi wa umma.

Utafiti wa sheria hiyo ulianza hivi karibuni ikiwa ni kuitikia agizo la Rais John Magufuli ambaye aliahidi kuifanyia marekebisho sheria hiyo wakati analizindua Bunge la 11 mwishoni mwa mwaka jana.

Akilihutubia Bunge katika eneo la kuziba mianya ya rushwa, Dk Magufuli aliahidi kuifumua sheria hiyo ambayo inatoa mianya kwa watumishi wa umma kuiba fedha za umma. “Tutasimamia kwa ukamilifu Sheria ya Manunuzi ya Umma ili kuhakikisha kwamba mianya yote ya fedha za umma inayotokana na usimamizi hafifu tunaiziba” alisema Rais.

Japan yatoa bilioni 116/- Bajeti 2016/17

Waziri wa Fedha, Dk Philip Mpango.

SERIKALI imesaini hati mbili za makubaliano na Japan, yatakayoiwezesha Tanzania kupata Yen za Japan bilioni sita ambazo ni sawa na Sh bilioni 116.4 kwa ajili ya kusaidia kukamilisha bajeti ya mwaka 2016/2017.

Akizungumza wakati wa kutia saini na kubadilishana hati za makubaliano, Katibu Mkuu wa Wizara ya Fedha na Mipango, Dk Servacius Likwelile alisema hati ya kwanza ya mkataba huo, ina lengo la kuboresha mazingira ya biashara nchini na kuongeza kasi ya uzalishaji wa ajira.

Alisema hati ya pili ni iliyosainiwa mwaka 1966 ya Wajapani waliokuwa wakija nchini kwa ajili ya kufanya shughuli za kujitolea, hivyo imerekebishwa kwa kuweka neno Jamhuri ya Muungano wa Tanzania ili waje kusaidia katika sekta za afya, elimu na sekta nyingine Tanzania Bara na Visiwani.

Aidha, Dk Likwelile alisisitiza kuwa kukosekana kwa fedha kutoka Marekani za Changamoto ya Milenia (MCC-2), hakutaathiri miradi iliyokuwa ikiendelea, ambayo ni pamoja na Mradi wa Umeme Vijijini (REA) kwa kuwa fedha hizo hazikujumuishwa katika bajeti.

“REA haiwezi kuathirika kwa sababu hizo fedha za MCC-2 hazikuwa kwenye bajeti, lakini tungeshukuru kama tungezipata kwa sababu zingeongeza uwezo na kufanya uboreshaji,” alisema Dk Likwelile.
Hata hivyo, aliwataka Watanzania kuhakikisha kila mmoja anashiriki katika kuwezesha miradi ya maendeleo kwa kulipa kodi na kutoa taarifa juu ya wanaokwepa kodi ili nchi ijitegemee.

Kwa upande wake, Balozi wa Japan nchini, Masaharu Yoshida alisema Serikali ya Japan itaendelea kuisaidia Tanzania katika jitihada zake za kutengeza ajira hasa katika sekta binafsi kwa kupunguza gharama za kufanya biashara na kutengeza mazingira mazuri kwa viwanda.

“Serikali ya Japan ina nia ya dhati ya kuendelea kumuunga mkono Rais John Magufuli na serikali yake katika maono yake ya kujenga viwanda na kutengeneza ajira pamoja na kuwavutia wawekezaji wa kigeni kwa kutengeneza mazingira rafiki ya biashara,” alisema Balozi Yoshida.

Balozi Yoshida aliongeza kuwa ushirikiano kati ya Tanzania na Japan unaendelea kuimarisha ushirikiano uliopo na kwamba utasaidia kuongeza ukuaji wa uchumi na kijamii.

Mayanja: Akili yangu kwenye ubingwa tu

KOCHA Jackson Mayanja wa Simba, amewataka wadau kuacha kuangalia amekorofishana na nani, na badala yake waungane naye katika kufikiria maendeleo ya klabu huku akisema kwa sasa anachowaza ni ubingwa wa Ligi Kuu Tanzania Bara.

Alisema Simba kwa sasa inapambana kusaka ubingwa wa Ligi Kuu Tanzania Bara, hivyo mawazo yote yako katika mbio hizo.

“Sina ugomvi na mtu hata mmoja, akili yangu ni kuhakikisha Simba inafanya vizuri kwa kushirikiana na wenzangu wote hadi uongozi. “Lakini kama atatokea mtu akafanya mambo ya utovu wa nidhamu, basi ajue hakutakuwa na mchezo, sitakubali,” alisema.

Mayanja aliingia kwenye mtafaruku na Hassan Isihaka ambaye alimjibu kocha huyo maneno yasiyo ya kiungwana. Baadaye akafuatia Abdi Banda na Mayanja amesisitiza wote kuadhibiwa, jambo ambalo limesifiwa sana na wadau wa soka kutokana na tabia yake ya kushikilia nidhamu.

Yanga kambini bila nyota tisa

Kocha Msaidizi wa Yanga, Juma Mwambusi

IKIWA bila ya nyota wake tisa, wawakilishi wa Tanzania katika michuano ya Ligi ya Mabingwa Afrika, Yanga jana walianza kambi kujiandaa kwa michezo ya Kombe la FA, Ligi Kuu ya Tanzania Bara na ule wa kimataifa dhidi ya Al Ahly ya Misri.

Iliingia kambini baada ya mazoezi ya asubuhi yaliyofanyika Uwanja wa Chuo cha Polisi Ufundi, Kurasini.

Akizungumza Dar es Salaam jana, kocha msaidizi wa Yanga, Juma Mwambusi alisema kikosi chake kimeingia kambini na wachezaji tisa ndio wanaokosekana, wakiwemo saba ambao ni wagonjwa na wengine wakiwa kwenye vikosi vyao vya timu za taifa.

Wanaoksekana katika kambi hiyo wametajwa kuwa ni Mbuyu Twite, Donald Ngoma, Malimi Basungu, Saidi Juma `Makapu’, Geofrey Mwashiuya, Simon Matheo na Benedicto Tinocco.


Tambwe na Niyonzima pia hawako kutokana na kukabiliwa na majukumu katika timu zao za taifa.
“Lakini wachezaji wetu wa kimataifa kama Amisi Tambwe (Burundi) na Haruna Niyonzima (Rwanda) hatutakuwa nao kwa vile wapo kwenye timu zao za taifa,” alisema Mwambusi.

Aliongeza kuwa, maandalizi yanaendelea vizuri huku akisema ari ya kikosi chake ni kubwa na dhamira ya uongozi ni kuona Yanga inafanya vizuri katika mashindano yote inayoshiriki.

“Tuna imani tutafanya vizuri kwani mpaka sasa tuna rekodi nzuri kwenye mashindano tunayoshiriki,” alisema bila kutaja mahali ilipo kambi yao, lakini ikiaminika ni moja ya hoteli za kifahari jijini Dar es Salaam.

Yanga wanaingia kambini wakijiandaa na wiki ngumu zaidi kwani, kwani watacheza mechi nne za mashindano matatu ndani ya siku 10.

Kesho wataanza kwa kumenyana na Ndanda FC ya Mtwara katika hatua ya 16 Bora ya Kombe la FA, kabla ya kucheza mechi mbili mfululizo za Ligi Kuu Tanzania Bara dhidi ya Kagera Sugar ya mkoani Kagera Aprili 3 na dhidi ya Mtibwa Sugar ya Morogoro Aprili 6.

Siku tatu baadaye mabingwa hao wa soka nchini watamenyana na Al Ahly ya Misri katika mchezo wa kwanza wa hatua ya 16 Bora ya Ligi ya Mabingwa barani Afrika.

Wasichana 100 wafadhiliwa masomo

ZAIDI ya wasichana 100 wa ngazi mbalimbali za elimu wakiwemo wanaosoma elimu ya juu wilayani Siha, mkoani Kilimanjaro, wamepatiwa ufadhili wa masomo kama njia ya kuwezesha mtoto wa kike kukabiliana na changamoto ya maisha

Mbunge wa jimbo hilo, Dk Godwin Mollel alisema ufadhili kwa wanafunzi hao ulianza kutolewa kabla ya yeye kuwa mbunge wa jimbo la Siha.

Alisema lengo ni kuhakikisha mpango huo wa ufadhili unakuwa endelevu ili kuona kwamba wasichana wengi zaidi wananufaika elimu ambayo ndiyo mkombozi wao.

“Katika wanafunzi hao, wawili wapo ngazi ya diploma na wengine ngazi tofauti, hii itawapa fursa hapo baadaye kumudu maisha kwa kukuza uchumi….hata hili la uzazi wa mpango na mengine yote yanayohusu uzazi na malezi kwa watoto watalimudu, na taifa litapiga hatua za maendeleo,” alisema.
Dk Mollel alisema elimu kwa wasichana itasaidia kupunguza idadi ya vifo vya wajawazito na watoto chini ya miaka mitano, jambo ambalo litasaidia kupunguza idadi ya kitaifa ya vifo vya wanawake 7,900 kila mwaka.

“Mimi njia kubwa ambayo nitaipa nafasi ni elimu, hili suala la lishe kwa wajawazito halitakuwa taabu kupatikana, ukimpa elimu mwanamke hata chakula kinachostahili kwa ajili ya mjamzito na mtoto aliyeko tumboni kitakuwa ni kile chenye manufaa na siyo kujaza

Magufuli atua kwa kishindo Mwanza

Rais Dk John Magufuli akitokea katika mgahawa wa Victoria alikopata chakula cha mchana jijini Mwanza.

RAIS John Magufuli ametua kwa kishindo mkoani Mwanza kwa mara ya kwanza akiwa njiani kwenda nyumbani kwao Chato mkoani Geita tangu achaguliwe kushika wadhifa huo mwishoni mwa mwaka jana.
Ikiwa ni mara ya kwanza kwa Dk Magufuli kuwasili mkoani Mwanza baada ya kuchaguliwa kuwa Rais, ndege yake ilitua kwenye Uwanja wa Ndege wa Mwanza saa 5.11 asubuhi na yeye alikanyaga ardhi ya Mwanza saa 5.19 akiwa amefuatana na mkewe Janeth Magufuli akiwa njiani kwenda Chato kwa mapumziko.
Mara baada ya kutua, aliuagiza uongozi wa Mkoa wa Mwanza kumaliza na kutatua kero ya muda mrefu ya barabara ya Airport- Kayenze –Igombe (kilometa 24) iliyokuwa ni kero kubwa kwa wakazi wa Igombe kwa kuagiza barabara hiyo ifunguliwe mara moja.
Alimtaka Mkuu wa Mkoa wa Mwanza, John Mongela kuhakikisha kuwa wanafungua vizuizi vyote vilivyowekwa kwenye barabara hiyo mara moja ili kuwawezesha wananchi wa Igombe na Kayenze kuitumia barabara hiyo kuja mjini kwa ajili ya shughuli zao za kiuchumi na kijamii.
“Msimamo wangu bado haujabadilika, hakuna kuifunga barabara ya Kayenze – Igombe kwa sasa ili wananchi wa Kayenze wasihangaike kuja mjini, nakueleza Mkuu wa mkoa, wewe ndiye Mkuu wa mkoa nisije nikasike barabara hiyo imefungwa tena,” alisema huku akishangiliwa na hadhara iliyokuwa uwanjani.
Kwa upande wake, Mongela alimueleza Rais kuwa baada ya yeye kuondoka kwenda Chato, atakwenda moja kwa moja kuondoa vizuizi vyote vilivyowekwa katika barabara hiyo. “Nikuhakikishie baada ya wewe kuondoka hapa, nitakwenda moja kwa moja kuondoa vizuizi vilivyo kwenye barabara hiyo ili ianze kutumiwa na wananchi,” alisema Mongella.
Kufunguliwa kwa barabara hiyo, kutawaondolea adha wananchi waliokuwa wanalazimika kutembea mwendo mrefu wa kilometa 40 wakizunguka kupitia Buswelu kwenda Mwanza Mjini kutafuta mahitaji yao ya kila siku.
Kwa upande wake, Meneja wa Wakala wa Barabara (TANROADS) Mkoa wa Mwanza, Leonard Kadashi alisema barabara ilifungwa na uongozi wa uwanja wa ndege ili kupisha ukarabati uliokuwa ukiendelea uwanjani hapo.
Akiwa uwanjani hapo, Dk Magufuli alipokewa na Mongella na viongozi wengine wa mkoa akiwemo Mwenyekiti wa CCM Mkoa, Dk Anthony Diallo, na baadaye aliombewa dua na Imamu wa Msikiti wa Ibadh Shehe Nuhu Othmani na sala na Mchungaji Alex Rwakisumbwa wa Tabernacle Gospel Church International la jijini Mwanza.
Alifurahishwa na Kwaya ya Vijana ya AIC Makongoro iliyokuwa ikiimba wimbo wa amani ambayo alijumuika nayo kuimba wimbo huo huku akicheza pamoja na wanakwaya. Aliwashangaza watu waliojitokeza uwanjani hapo badala ya kuingilia eneo la VIP alipitia mlango mwingine ulio karibu na VIP na kusalimiana na wasafiri na wafanyakazi wa uwanja huo kabla ya kurudi tena VIP.
“Jamani hamjambo? Niliona nisipite bila ya kuwashika mikono,” alisema Rais huku akiwapungua mkono. Aidha, Rais na mkewe waliwashangaza wananchi baada ya kwenda kula chakula na wananchi kwenye mgahawa maarufu wa Airport ambako alitoa ofa maalumu ya kuwanunulia soda wananchi waliokuwa nje ya uwanja.
“Jamani karibuni tule chakula pamoja, wananchi wote waliopo hapa karibuni tunywe soda pamoja nitalipa bili,” alisema Rais Magufuli huku akishangiliwa na wananchi waliokuwa nje ya eneo la uwanja wa ndege.
Rais aliwapongeza wakazi wa Mkoa wa Mwanza kwa kumuonesha upendo mkubwa kwa kumchagua kwa kura nyingi za kishindo kuliko mikoa mingine, huku akiwaahidi hatawangusha na kwamba bado anakumbuka ahadi aliyowaahidi ya kuwanunulia meli itakayofanya safari zake kutoka Mwanza hadi Bukoba.
“Nawashukuru sana kwa kunichagua kwa kura nyingi sana, wakati mwingine huwa najiuliza niwalipe nini wana Mwanza, lakini nawaahidi sitawaangusha,” alisema Dk Magufuli na kuahidi kutenga fedha katika bajeti ya mwaka ujao kumalizia ukarabati wa Uwanja wa Ndege wa Mwanza.
Aliwashukuru viongozi wa madhehebu ya dini nchini kwa jinsi ambavyo wamekuwa wakitekeleza utume wa kazi zao kwa kumuombea yeye na Serikali yake na kuwataka wasichoke kufanya hivyo kwa kuwa Tanzania ni ya wote

Uhakiki wabaini wafanyakazi hewa 1,680

Rais Dk John Magufuli.

 

 

RAIS John Magufuli amesema kuwa uhakiki mdogo uliofanywa hivi karibuni kuhusu tatizo la wafanyakazi hewa nchini, umebaini wafanyakazi hewa 1,680 waliokuwa wakilipwa Sh bilioni 1.8. Amesema ni matarajio kuwa uhakiki unaofanywa nchi nzima utaisaidia serikali kubaini wafanyakazi hewa wengi zaidi na kunusuru fedha nyingi zaidi za Watanzania.

Machi 15, mwaka huu wakati akiwaapisha Wakuu wa Mikoa, Rais Magufuli alitoa siku 15 kwa viongozi hao kuhakikisha wanajumuisha wafanyakazi wote na kuwaondoa watumishi hewa.

Akizungumza na wananchi katika mkutano wa hadhara uliofanyika kwenye Uwanja wa Shule ya Sekondari Chato mkoani Geita jana, Rais Magufuli alitolea mfano wa mfanyakazi mmoja wa Mamlaka ya Mapato Tanzania (TRA) ambaye alikuwa akilipwa mishahara ya watu 17, na kueleza kuwa mfanyakazi huyo atafikishwa mahakamani.

Kwa mujibu wa taarifa ya Ikulu, Rais Magufuli pia alisema serikali yake imejiandaa kuboresha maslahi ya wafanyakazi kwa kupunguza kodi kutoka asilimia 11 ya sasa hadi asilimia 10 au 9 kuanzia bajeti ijayo.

Lakini alisema kwa wale wanaolipwa mishahara mikubwa, ambayo inafikia hadi Sh milioni 40, itapunguzwa na kuweka kima cha juu cha mshahara usiozidi Sh milioni 15. Rais Magufuli ambaye amefika nyumbani kwake katika Kijiji cha Mlimani, Wilaya ya Chato kwa mara ya kwanza tangu achaguliwe kuwa Rais, alitoa mwito kwa kila Mtanzania kuchapa kazi kwa juhudi ili nchi iondokane na utegemezi wa misaada ya wafadhili ambayo huambatana na masharti.

Dk Magufuli alisema jukumu kubwa lililo mbele ya Watanzania kwa sasa, ni kushikamana na kujisimamia katika maendeleo ili kila mmoja ahakikishe anaongeza uzalishaji na utendaji kazi mahali pake pa kazi.

“Kwa hiyo ni lazima tujisimamie sisi wenyewe, na tukijisimama sisi wenyewe kwa kila mmoja kuwajibika mahali alipo, kama ni mfanyakazi afanye kazi kwelikweli, kama ni mkulima afanye ukulima wake kwelikweli, kama ni mfanyabiashara afanye biashara kwelikweli, kama ni mfugaji afuge kwelikweli, kama ni mvuvi avue kwelikweli, Tanzania hii tutavuka,” alisema Rais Magufuli.

Aidha, Rais Magufuli alisema serikali yake imeamua kuchukua hatua kudhibiti nidhamu serikalini, kwa kuhakikisha inawachukulia hatua watumishi wa umma wanaolisababishia taifa upotevu mkubwa wa fedha, na ameahidi kuwa hatua hizo maarufu kwa jina la “kutumbua majipu” zitaendelea kuchukuliwa hadi tatizo hilo likomeshwe.

Dk Magufuli pia alikumbusha viongozi wote wakiwemo Wakuu wa Mikoa, Wakuu wa Wilaya, Makatibu Tawala na Wakurugenzi, kutekeleza wajibu wao ipasavyo na ameweka bayana kuwa mahali popote ambapo hapatakuwa na ufanisi, kiongozi husika atakuwa amedhihirisha kuwa hatoshi kuendelea na wadhifa aliopewa.

Rais Magufuli aliwapongeza walimu kote nchini kwa kufanya kazi nzuri ya kufundisha, licha ya changamoto ya ongezeko kubwa la wanafunzi waliojiunga darasa la kwanza mwaka huu, lakini ametaka wazazi na kamati za shule kushirikiana na walimu kuwasimamia wanafunzi ili wafanye vizuri katika masomo yao.

“Naziomba kamati za shule zote Tanzania nzima, kama haziwezi kusimamia nidhamu ya wanafunzi shuleni, zile kamati za shule zijiuzulu. Lakini pia kama wewe ni Mwalimu Mkuu, shule yako kila siku inatoa divisheni ziro nyingi kila mwaka, sioni sababu ya wewe kuendelea kuwa Mwalimu Mkuu,” alisisitiza Dk Magufuli.

Serikali yaipuuza Marekani

Waziri wa Fedha, Dk Philip Mpango

WAKATI Bodi ya Shirika la Changamoto za Milenia (MCC) ikitangaza kuinyima Tanzania msaada wa Dola za Marekani 473 (zaidi ya Sh trilioni 1), Serikali imesema ilishajiandaa kuhusu hatua hizo na fedha hizo haikuzijumuisha katika bajeti ya mwaka ujao wa fedha wa 2016/17.
MCC imezuia fedha hizo za maendeleo kutokana na hatua ya Tanzania kuitisha uchaguzi wa marudio ya Zanzibar pamoja na kutumika kwa Sheria ya Makosa ya Mitandao. Chini ya Mpango wa Uwekezaji wa MCC–2, fedha hizo zilikuwa ziende katika kuboresha huduma za umeme, ikiwamo kusambaza umeme katika vijiji vingi zaidi nchini.
Kiasi cha asilimia 46 ya Watanzania kwa sasa wanapata umeme kutoka asilimia 10 ya mwaka 2005 na sehemu kubwa ya asilimia hiyo ilitokana na msaada wa MCC-1. Fedha hizo zilikuwa ni awamu ya pili ya msaada kutoka MCC na tayari katika awamu ya kwanza, Tanzania ilipokea Dola za Marekani milioni 698 ambazo zilitumika kwa ajili ya ujenzi wa barabara za Tunduma- Sumbawanga, Tanga-Horohoro na Namtumbo-Songea-Mbinga.
Fedha hizo zilitumika kujenga upya mfumo wa huduma za maji kwa ajili ya miji ya Dar es Salaam na Morogoro na zilitumika kusambaza umeme katika vijiji vya mikoa 10 ya Tanzania Bara, zilitumika kutandaza njia ya pili ya kusafirisha umeme chini ya Bahari ya Hindi kati ya Bara na Tanzania Visiwani na pia zilitumika kujenga barabara zote kuu za Kisiwa cha Pemba na baadhi ya barabara za Unguja kwa kiwango cha lami.
Kauli ya Waziri wa Fedha Akizungumzia na gazeti hili jana, Waziri wa Fedha na Mipango, Dk Phillip Mpango alisema tangu Desemba mwaka jana walishasoma alama za nyakati na hivyo kuamua kutozijumuisha fedha za MCC-2 katika maandalizi ya Bajeti ya Serikali yanayoendelea kwa mwaka ujao wa fedha.
“Tulisoma kwenye mitandao matamshi ya viongozi wa Mfuko huo ndio maana tukaamua kutozijumuisha fedha za MCC kwenye bajeti ya mwaka ujao wa fedha, hivyo Watanzania wasiwe na wasiwasi juu ya kusitishwa kwa msaada huo,” alisema Dk Mpango.
Hata hivyo, alisema Serikali itatoa tamko rasmi baada ya kupata barua kutoka MCC ikiwaeleza wamesimamisha msaada huo hadi lini na nini Tanzania inatakiwa kufanya ili kupata msaada huo. “Sisi tukipata hiyo barua tutaitafakari na tutawajibu,” aliongeza waziri. Alisema Serikali bado inaamini uhusiano wa Tanzania na Marekani ni mzuri na wa muda mrefu hivyo huko mbele kutakuwepo na maelewano na fedha hizo zitatolewa.
“Sisi sio nchi ya kwanza kusimamishiwa msaada huo, Malawi waliwahi kunyimwa lakini baadaye walipewa, na mimi bado naamini tutaelewana huko mbele ya safari,” alibainisha. Dk Mpango pia alitoa mwito kwa Watanzania kuiunga mkono Serikali inapokusanya maduhuli kutoka vyanzo visivyo vya kodi na wahakikishe wanalipa kodi inayostahili ili nchi iondokane na utegemezi wa wahisani.
“Hili liwe fundisho kwetu kwamba nchi itapiga maendeleo kwa kutegemea vyanzo vya ndani, hatuwezi kuwa tegemezi miaka yote ni lazima ifike mahali tusimame kwa miguu yetu na tutafanikiwa tu iwapo tutalipa kodi stahiki,” alisema Dk Mpango.
Uamuzi wa MCC Desemba 2015, Bodi ya Wakurugenzi ya MCC iliahirisha upigaji kura ya kuichagua tena Tanzania kufuzu vigezo vya kupata mkataba wa mpya wa MCC kutokana na kufutwa kwa matokeo ya uchaguzi Zanzibar na kusisitizia haja ya kukamilishwa haraka, kwa haki na kwa amani kwa mchakato wa uchaguzi.
Aidha, Bodi ilihitaji kupata uthibitisho kutoka kwa Serikali ya Tanzania kwamba Sheria ya Makosa ya Mitandao isingetumika kukwaza uhuru wa kujieleza na kujumuika, hususan kuhusu matumizi ya sheria hiyo kuwakamata watu kadhaa wakati wa uchaguzi. Wasiwasi huu ulirejelewa mara kadhaa, ikiwa ni pamoja na katika tamko lililotolewa na Balozi Mark Childress.
Mojawapo kati ya vigezo vya msingi kabisa ambavyo MCC hutumia kuingia ubia na nchi yoyote, ni dhamira ya dhati ya nchi hiyo kuimarisha demokrasia na kuendesha chaguzi zilizo huru na za haki.
Chaguzi visiwani Zanzibar na matumizi ya Sheria ya Mtandao yanakwenda kinyume kabisa na dhamira hii, imedai Marekani. “Kwa sababu hiyo, wakati ambapo Marekani na Tanzania wanaendelea kuchangia vipaumbele vingi, Bodi ya Wakurugenzi ya MCC imeona kwamba Serikali ya Tanzania imekuwa ikichukua hatua zisizoshabihiana na vigezo vya kupata sifa ya kuingia ubia na MCC. Hivyo basi, Bodi ilipiga kura kusitisha ubia wake na Serikali ya Tanzania.
Kwa hali hiyo, MCC inasimamisha shughuli zote zinazohusiana na maandalizi ya mkataba wa pili na Tanzania,” ilieleza. Balozi wa Marekani anena Katika tamko lake, Balozi wa Marekani nchini Mark Childress alisema, “Ninaunga mkono kikamilifu uamuzi huo wa Bodi wa kusitisha maandalizi ya mkataba wa pili. Marekani na Tanzania tumekuwa na uhusiano wa muda mrefu na wa kina katika sekta nyingi.
“Tukiwa mbia mkubwa zaidi wa maendeleo kwa Tanzania, Marekani itaendelea kufanya kazi pamoja na Tanzania katika kuboresha afya na elimu, kukuza uchumi na kuimarisha usalama,” alisema Balozi Childress. Maoni ya wachumi Mkurugenzi wa Asasi ya Utafiti wa Kupunguza Umaskini (REPOA), Profesa Samuel Wangwe alisema athari ya msaada wa MCC ni ndogo kwa uchumi wa nchi kwa kuwa nusu ya fedha hizo zingerudi Marekani kutokana na mfumo wa masharti hayo.
Alisema dawa ya kujitegemea ni kama ile aliyoitoa Rais John Magufuli kutumia rasilimali za ndani kuendeshea shughuli za maendeleo badala ya kutegemea misaada kutoka nje. Profesa Wangwe alihoji kama suala ni kuminya demokrasia, vitendo ambavyo Marekani imefanya Irak na Libya ndio kielelezo cha demokrasia?

Dk Magufuli: Tusibaguane

RAIS John Magufuli amewataka Watanzania waendeleze upendo na mshikamano walionao ili kuendelea kuilinda amani ya nchi na wasibaguane. Akizungumza wakati wa Ibada ya Pasaka iliyofanyika katika Kanisa la Kiinjili la Kilutheri Tanzania (KKKT) la Azania Front, Dar es Salaam jana, Rais Magufuli alisema Watanzania wanapaswa kutokubaguana kwa dini, rangi wala makabila na washirikiane katika umoja wao.

Rais Magufuli alisema wakati taifa likiadhimisha sikukuu hiyo ya kufufuka kwa Yesu Kristo, wananchi wanapaswa kusherehekea kwa kufanya kazi ili taifa lisonge mbele.
“Niwaombe Watanzania wenzangu wakati tunaadhimisha Sikukuu hii ya kumbukumbu ya kufufuka kwa Yesu Kristo tufufuke naye katika upendo wake lakini tufanye kazi kweli kweli kwa sababu vitabu vinasema asiyefanya kazi na asile,” alisema Rais Magufuli.

Aidha, alisema endapo Watanzania kwa umoja wao wakiamua kufanya kazi kwa bidii, Taifa halitakuwa masikini na kuacha kutegemea misaada ya wahisani wa nje. Alisema kuwa Tanzania ni nchi iliyojaaliwa neema kwa kuwa na rasilimali nyingi na hivyo wananchi wanatakiwa kusimama imara ili iweze kuja kuwa Taifa litakalokuwa likitoa misaada kwa mataifa mengine ya nje.

Rais Magufuli aliwaomba Watanzania kutochoka kuliombea Taifa pamoja na yeye ambaye ana jukumu gumu na zito lakini kupitia maombi ya wananchi anaamini atatimiza yale aliyotakiwa kuyatimiza.

“Naomba Watanzania tusichoke kuliombea Taifa letu, na mimi nawashukuru kwa kuendelea kuniombea. Jukumu hili ni gumu, zito na ni msalaba lakini najua kwa sala zenu, kwa maombi yenu nitatimiza yale ninayotakiwa kuyatimiza,” alieleza Rais Magufuli.

Kwa upande wake, Askofu Mkuu wa KKKT Dayosisi ya Mashariki na Pwani, Dk Alex Malasusa aliyeongoza ibada hiyo, aliwakumbusha wananchi kurejesha maadili ndani ya nyumba zao yaliyoanza kupotea kwa kumrudia Mungu.

Askofu Malasusa alisema kuwa fmilia nyingi siku hizi zimeparaganyika, ndoa nyingi zimekuwa hazidumu kwa sababu watu wameacha kufanya ibada na hivyo maadili tena katika nyumba yamepotea. “Tufufue maisha ya uadilifu ndani ya ndoa zetu.

Siku hizi baba na mama wanazikimbia nyumba zao kwa sababu maadili yamepotea ndani ya nyumba, turudishe maadili kwa kufanya ibada,” alisema Dk Malasusa. Aidha, Askofu Malasusa aliwataka Watanzania kwa imani zao kuacha kumsifu Rais Magufuli kwa kupiga makofi na badala yake kila mmoja kwa imani yake asimame na kumuombea kwa kuwa sasa taifa limeanza kuwa na matumaini mapya na nuru kwa kumpata kiongozi aliye mwadilifu.

Shein aitisha Baraza la Wawakilishi

 

RAIS wa Zanzibar, Dk Ali Mohammed Shein ameitisha mkutano wa kwanza wa Baraza jipya la Tisa la Wawakilishi keshokutwa kwenye Ukumbi wa Baraza la Wawakilishi, Chukwani mjini Unguja.
Hayo yameelezwa na Katibu wa Baraza la Wawakilishi, Dk Yahya Khamis Hamad wakati akizungumza na waandishi wa habari kwenye ukumbi wa Baraza la Wawakilishi jana.

Hamad alisema amepokea barua kutoka kwa Rais Shein ambayo inaitisha mkutano wa kwanza wa Baraza la Wawakilishi, ambalo kwa mujibu wa kanuni zake, linamtambua Rais kama ni sehemu ya pili ya baraza hilo na ndiyo mwenye mamlaka ya kuamua tarehe na mahala pa kufanyika mkutano wa kwanza.

Alisema kama Kanuni za Baraza la Wawakilishi Toleo la 2012 linaelezea kuwa katika Mkutano wa Kwanza wa Baraza la Wawakilishi shughuli ya mwanzo ni kumchagua Spika wa Baraza la Wawakilishi, na hadi sasa aliyeteuliwa na kuchukua fomu ya kuwania nafasi hiyo ambaye amethibitishwa na Tume ya Uchaguzi Zanzibar ni Zuber Ali Maulid kutoka Chama Cha Mapinduzi (CCM).

Katibu wa Baraza la Wawakilishi alisema wajumbe wote wameanza kujengewa mazoea ikiwa pamoja na kujisajili kuanzia leo hadi Aprili 6, mwaka huu. “Kesho (leo) kusajiliwa kwa wajumbe na kupigwa picha za vitambulisho, Machi 29 asubuhi kutakuwa na mkutano wa vyama vya siasa, pia siku hiyo mchana kutakuwa na mkutano wa mwanzo wa wajumbe wote wa baraza, Machi 30 kuanza kwa mkutano wa kwanza wa baraza na baadaye uchaguzi wa spika pamoja na kiapo cha spika na wajumbe,” alisema Hamad.

Aliwaambia waandishi wa habari kuwa Machi 31, mwaka huu kutakuwa na uchaguzi wa Naibu Spika na Mwenyekiti wa Baraza, Aprili 5, 2016 kutakuwa na uchaguzi wa wajumbe wa Tume ya Bajeti ya Baraza na wajumbe watano wa baraza watakaoingia katika Bunge la Jamhuri ya Muungano wa Tanzania.

Baraza hilo jipya linalotarajiwa kuanza keshokutwa litakalohutubiwa na Dk Shein lina idadi ya wajumbe 88 ambao wajumbe 54 ni wawakilishi waliochaguliwa na wananchi, 22 Wawakilishi wa Viti Maalumu, 10 uteuzi wa Rais ambao bado kuteuliwa, Mjumbe mmoja ambaye ni Mwanasheria Mkuu na Spika ambaye ni nje ya wajumbe wa baraza.

Askofu aonya maadui ndani ya Kanisa

ASKOFU wa Kanisa la Anglikana Dayosisi ya Dar es Salaam, Dk Valentino Mokiwa ameonya juu ya kuwepo hatari ya kusambaratika kwa makanisa nchini kutokana na kuibuka kwa maadui ndani ya makanisa yenyewe.

Alisema katika miaka ya hivi karibuni kumeibuka vikwazo vinavyohatarisha mhimili wa kanisa nchini ikiwemo mashindano baina ya madhehebu, vita baina ya maaskofu, ulaghai, wizi, fitna na matendo maovu.

Aidha, Mkuu wa Mkoa wa Dar es Salaam, Paul Makonda amepiga marufuku makanisa kutumia polisi kwenye migogoro yao na kuwa watakaotoa taarifa ya kuomba polisi ili kuingilia masuala ya kanisa watawekwa mahabusu.
Askofu Dk Mokiwa aliyasema hayo alipokuwa akitoa mafundisho katika Ibada Kuu ya Sikukuu ya Pasaka ambayo kitaifa ilisaliwa katika Kanisa la Anglikana la St Albano, Upanga jijini Dar es Salaam jana.

Akizungumzia kuhusu mashindano baina ya makanisa yenyewe, Askofu Mokiwa alisema tofauti na miaka ya nyuma ambako Wakristo bila kujali tofauti yao ya kimadhehebu walikuwa wakiishi kwa umoja, upendo na maelewano, hali ni tofauti sasa kwani kumeibuka mashindano baina ya madhehebu.

“Hivi sasa Kanisa hili linataka kujionesha kuwa ni bora kuliko lingine, linataka kuonekana maaskofu wake wana sauti ya kusikilizwa kuliko wengine, linataka kuonesha lina shule na vitega uchumi vingi kuliko lingine, linataka kuonesha lina fedha nyingi kuliko lingine, mambo ambayo hayana msingi katika Ukristo,” alisema Askofu Mokiwa.

Kuhusu vita baina ya maaskofu, Dk Mokiwa alisema kumeibuka jambo la hatari kwa maaskofu wa madhehebu tofauti kuanza kutukanana, kushutumiana, kufanyiana hujuma na hata kutaka kuangushana, hatua ambayo inatia shaka mustakabali wa uhai wa Kanisa. “Anasimama askofu wa dhehebu moja anamtukana askofu mwenzake hadharani bila aibu.

Askofu anadiriki kuvuka mipaka yake anazungumzia madhehebu yasiyomhusu kama vile yeye ni kiongozi wa madhehebu yote nchini jambo ambalo ni la hatari kwa Kanisa,” alisema Dk Mokiwa.
Alisema kama hiyo haitoshi sasa kumeingia ulaghai, wizi, fitna, majivuni na matendo mengine maovu ndani ya Kanisa, hatua ambayo alisema inakwenda kinyume cha mafundisho ya Mungu kuhusu Kanisa na alionya kuwa ni lazima mtindo huo ukemewe ili ukome mara moja kwa nia ya kulinusuru Kanisa.

“Hatuwezi leo hii kuzungumzia maadui wa nje wakati wapo maadui wa ndani ya Kanisa lenyewe ambao ni hatari zaidi na wanahatarisha uhai na ukuaji wa kiroho. Naomba kuyapongeza makanisa ambayo yameendelea kuonesha utulivu na kufuata misingi ya Kanisa, lakini kwa wale wanaokiuka misingi ya Ukiristo ni lazima tuwaeleze,” alisema.

Kwa upande wake, akitoa salamu za Sikukuu ya Pasaka katika Ibada hiyo, Mkuu wa Mkoa wa Dar es Salaam Makonda alieleza kushangazwa na hatua ya makanisa kuanza mtindo wa kutumia vyombo vya dola ili kushughulikia mambo yao ya ndani na kwamba hatakubali kuona mtindo huo ukiendelea kutokea.

“Ni jambo la aibu sana kuona sasa badala ya sisi serikali kuja kanisani kuomba msaada wa kuleta amani na utulivu ndani ya jamii, eti makanisa ndiyo yanakuja serikalini kuomba ulinzi wa polisi ili waweze kutimiza lengo fulani.

Imefikia hatua watu wanataka kumsimika Askofu halafu eti wanaomba ulinzi wa polisi. “Labda niseme tu kwamba hilo mimi sitalikubali. Ni lazima makanisa yawe mfano wa kushughulikia masuala yao kwa misingi ya kiroho.

Ahadi kila kijiji kupata milioni 50/- sasa yaiva

Waziri wa Fedha, Dk Philip Mpango.

SERIKALI imetenga jumla ya Sh bilioni 811 zitakazotumika kutekeleza ahadi ya Rais John Magufuli ya kukipatia kila kijiji Sh milioni 50 kwa ajili ya shughuli za maendeleo. Imeelezwa kwamba serikali imeshaanza kushirikisha wadau mbalimbali kupata maoni ya jinsi ya kuendesha mpango huo kwa ufanisi na tija.
Katibu Mtendaji wa Baraza la Uwezeshaji Wananchi Kiuchumi (NEEC) alisema serikali itaanza kutoa fedha hizo kuanzia mwaka wa fedha ujao. Alikuwa akizungumza na waandishi wa habari mwishoni mwa wiki baada ya mkutano wa wadau waliokuwa wanajadili rasimu ya mpango huo wa utoaji fedha kwa ajili ya maendeleo.
Mkutano huo ulihudhuriwa na wawakilishi wa halmashauri za wilaya, Benki Kuu ya Tanzania (BoT), Mfuko wa Maendeleo ya Jamii (TASAF), mabenki, mifuko ya hifadhi ya jamii na vikundi mbalimbali. “Kwa kuanzia, fedha hizo zitatolewa kwa awamu tatu katika kipindi cha miaka mitano,” alisema.
Alisema fedha hizo zitatolewa kupitia benki kabla ya kutolewa kwa vikundi mbalimbali kama Vicoba, Saccos na vikundi vingine kulingana na taratibu zitakazowekwa. Alisema mpango utaanza na mikoa 10 iliyo nyuma katika kutumia huduma za kifedha kwa kuzingatia taarifa ya utafiti ya Finscope ya mwaka 2013.
Mikoa hiyo ni Singida, Lindi, Mtwara, Mbeya, Shinyanga, Geita, Kagera, Dodoma, Rukwa na Ruvuma. Akifungua mkutano huo, Waziri wa Nchi, Ofisi ya Waziri Mkuu, Sera, Uhusiano ya Bunge, Kazi, Ajira, Vijana na Walemavu, Jenista Mhagama, alisema mkutano huo ulilenga kupata maoni ya wataalamu ya namna bora ya kuutekeleza.
Akizungumza kwa niaba ya Waziri, Kaimu Mkurugenzi, Maendeleo ya Sekta Binafsi, Uwekezaji na Uwezeshaji, Ofisi ya Waziri Mkuu, Victor Mwainyekule alisema mawazo yaliyopatikana yatazingatiwa kuboresha mpango huo unaolenga kupambana na umaskini.
Mkuu wa Uendeshaji, Benki ya Wanawake (TwB), Zablon Yebete alisema mpango huo ni uwekezaji mkubwa kwa Watanzania unaopaswa kuungwa mkono na vyombo vya fedha na wadau wengine nchini.
“Tunatakiwa kuunga mkono mpango huu unaohusisha vyombo vya fedha katika utekelezaji wake kwa faida ya taifa,” alisema. Kwa mujibu wa mpango huo, walengwa watapatiwa mafunzo ya ujasiriamali kabla ya kupatiwa fedha hizo.

Katibu Mtendaji NACTE ajiuzulu

KATIBU Mtendaji wa Baraza la Taifa la Elimu ya Ufundi (NACTE), Dk Primus Nkwera.

KATIBU Mtendaji wa Baraza la Taifa la Elimu ya Ufundi (NACTE), Dk Primus Nkwera, amejiuzulu nafasi hiyo ili kupisha uchunguzi wa tuhuma mbalimbali. Uamuzi wa kujiuzulu kwa Dk Nkwera, ulitangazwa juzi na Mwenyekiti wa Bodi ya Baraza hilo, Steven Mlote wakati akizungumza na wafanyakazi wa baraza hilo kwenye kikao cha dharura.
Mlote alisema, Dk Nkwera amefikia uamuzi wa kujiuzulu, ili kulinda hadhi ya baraza hilo, baada ya gazeti moja la kila wiki kuchapisha habari zikimtuhumu kwa mambo mbalimbali, ikiwemo madai ya kughushi vyeti.

Alisema kwa mujibu wa Dk Nkwera nafasi kubwa kama hiyo katika taasisi ya elimu, haipaswi kushikwa na mtu mwenye tuhuma ya aina yoyote, hivyo baada ya kutafakari ameona ajiweke pembeni na uongozi wa baraza hilo, ili uchunguzi ufanyike akiwa pembeni.

“Tumetumia muda mrefu kutafakari hoja za Dk Nkwera na tumekubali kujiuzulu kwake kwa shingo upande,” alisema Mlote akiwaambia wafanyakazi waliokuwa katika kikao hicho. Mlote alisema kazi iliyofanywa na Dk Nkwera akiwa kiongozi wa baraza hilo inafahamika kwa kila mmoja na uamuzi wake huo ni majonzi kwa baraza hilo.

“Najua mmepata mshituko mkubwa, lakini Dk Nkwera hajafa. Yuko hai, na huyu bado ni mtumishi wa Serikali. Alichofanya ni kuamua kuachana na ukatibu mtendaji. Tutaendelea kumtumia itakapobidi kwa ushauri.

“Wakati mwingine ni lazima mkubaliane na hali hii, lakini endeleeni kuchapa kazi kwa ufanisi kama kawaida, kana kwamba bado mko na Dk Nkwera,” alisema Mlote. Kutokana na kujiuzulu kwa Dk Nkwera, Mlote alieleza kuwa Bodi imemteua Mkurugenzi wa Mitaala wa baraza hilo, Dk Adolf Rutayunga kukaimu nafasi hiyo wakati taratibu nyingine zikiendelea.

Akizungumza katika kikao hicho, Dk Rutayunga alisema kuwa viatu ambavyo ameiacha Dk Nkwera ni vikubwa kwake lakini atajitahidi kuhakikisha anaendeleza yale yote ambayo ameyaacha.
“Jambo hili ni kubwa, uamuzi huu wa kujiuzulu kwa Dk Nkwera ni mzito, lakini hatuna cha kufanya. Tutashikamana kuhakikisha kwamba kazi za Baraza zinasonga mbele kwa weledi uleule” alisema.

Mlote alipotafutwa na mwandishi wetu alikiri Dk Nkwera kujiuzulu bila kueleza kwa undani sababu za kujiuzulu kwake. “Ni kweli amejiuzulu nafasi yake, lakini siwezi kukupa maelezo yote kwa sababu niko barabarani naendesha gari,” alisema Mlote

WAFUKIWA WAKIIBA MADINI

Kamanda wa Polisi wa Mkoa wa Arusha, Liberatus Sabas.

 

WACHIMBAJI wadogo watatu wanasadikiwa kufa baada ya kufukiwa na kifusi, wakati wakiwa kwenye harakati za kuiba madini ya tanzanite katika mgodi wa Tanzanite One, Mirerani.
Taarifa ya kufukiwa kwa wachimbaji hao maarufu kama Wanaapolo, ilitolewa jana na mchimbaji mwenzao, Gidish Benedict (32), aliyekuwepo eneo la tukio na kunusurika wakati wenzake wakifukiwa.
Kwa mujibu wa Benedict aliyezungumza na waandishi wa habari mjini hapa, hajui kama wenzake watakuwa hai, kwani sehemu waliyokuwepo haikuwa na hewa hivyo kuna uwezekano wa wenzake watatu kufa wakiwa huko chini.
Aliwataja wenzake hao waliofukiwa kuwa ni Saidi Mgosi, mkazi wa Boma mkoani Kilimanjaro na wengine aliowataja kwa jina moja kuwa ni Dominic, mkazi wa Zaire Mirerani kwa jina la utani anaitwa Bwashee na Khalid, ambaye hafahamu anakotoka.
“Sijui kama wenzangu wapo hai au la maana nilimwambia mbona nguzo imebana sana, wakasema toka wewe si mzoefu wacha sisi wazoefu tufanye kazi. “Nilijibanza pembeni ya mwamba na kuwapisha watengeneze njia ili tutoke, lakini wakati wakigonga nguzo, udongo ulimwagika kwa kasi mimi nikarudi kwenye upenyo nikafanikiwa kupona, lakini sijui wenzangu kama wapo hai watakuwa wamefukiwa na kifusi,” alisema.
Amekiri kuwa walizama ndani ya mgodi huo Jumatatu ya wiki hii saa 7 usiku kwa njia za panya maarufu ‘bomu’, lakini wenzake wamefukiwa na kifusi na haijulikani kama wako salama.
*Tanzanite One
Akizungumzia jana Mirerani, Kaimu Mkurugenzi wa Kampuni ya Sky Associates, inayomiliki mgodi huo wa Tanzanite One, Apolinary Modest alisema Wanaapolo hao waliingia katika mgodi huo uliofungwa Jumatatu wiki hii na kuanza kuchimba madini.
Kwa mujibu wa Modest, baada ya kumaliza kazi hiyo walianza safari ya kurudi juu, lakini walishindwa kufika juu siku ya Ijumaa, baada ya kugonga nguzo ambayo ilitoa udongo mwingine uliosababisha njia hiyo ya panya kuziba.
“Hivi sasa tupo na wataalamu wetu wa uokoaji kutoka Afrika Kusini kwa ajili ya kuwaokoa Wanaapolo hawa ambao hatujui kama wapo hai au la. “Bado kama mita mbili au tatu kufika eneo la tukio chini ya ardhi ili kuona kama wapo hai au wamekufa au wamepita njia nyingine za panya na kukimbia,” alisema Modest.
Alisema njia za panya zipo nyingi na kampuni imejitahidi kuziba, lazini zinazibuliwa na Wanaapolo ili kuingia ndani ya mgodi uliofungwa au unaoendelea kuchimbwa madini hayo kwa nia ya kuiba madini.
Modest alisema machimbo yapo mengi zaidi ya 100 ambayo yamezibwa, lakini Wanaapolo hao wamekuwa wakizibua kwa njia zao na kuingia eneo la Tanzanite One, ili kuiba madini hayo na mchimbaji huyo aliye hai, anashirikiana na waokoaji kuonesha njia walizopita ili wenzake waokolewe.
Wanaowapeleka Shuhuda huyo, Benedict aliendelea kusema kazi hiyo ya kwenda kuiba madini, hufadhiliwa na wafanyabishara wakubwa wa madini ambao hutoa mamilioni ya fedha kwa wachimbaji hao ili wafanikishe wizi huo.
Alisema wao hawana nia mbaya, bali husukumwa na wafanyabiashara hao ambao hutenga mamilioni ya fedha kwa kazi hiyo. ‘’Sisi tunanunuliwa zana zote za uchimbaji na tunatumwa kwenda kuiba madini Tanzanite One na huko chini ni usalama wako ndio unakulinda na ukipata madini, unampelekea kwa aliyekufadhili ambaye ni mafanyabiashara mkubwa wa tanzanite.
“Naomba mnisamehe maana msukumo ndio unatufanya tufanye kazi hii ya bomu na njaa pia inachangia,’’ alisema. Kamanda wa Polisi wilayani Simanjiro, Francis Massawe amethibitisha tukio hilo na kuongeza kuwa bado wanaendelea na uokozi. Imeandikwa na Veronica Mheta na John Mhala, Arusha.

Waliochoma nyumba saba Pemba wasakwa

Naibu Katibu Mkuu wa CCM- Zanzibar, Vuai Ali Vuai.

 

JESHI la Polisi limeanza msako wa watu waliochoma nyumba tano za wananchi wakazi wa Kangagani, ofisi ya Chama Cha Mapinduzi (CCM) na Kituo cha Afya katika Mkoa wa Kaskazini Pemba.
Akizungumza na gazeti hili kwa njia ya simu kutoka Pemba jana, Kamanda wa Polisi Mkoa wa Kaskazini Pemba, Hassan Nasiri Ali, alisema watu wanaotafutwa wamechoma nyumba tano za wananchi, Kituo cha Afya cha Kiuyu Minungwini na ofisi ya CCM Tibirinzi.
“Jeshi la Polisi linaendelea na uchunguzi kuhusu matukio matatu ya hujuma za kuchoma moto nyumba za wananchi, kituo cha afya na ofisi ya Chama Cha Mapinduzi. Matukio hayo yote yanaonekana kuwa na muelekeo wa vitendo vya hujuma,” alisema.
Kamanda Nasiri alisema katika matukio hayo hadi sasa hakuna mtu anayeshikiliwa Polisi wala hakuna aliyejeruhiwa na Jeshi la Polisi linaendelea na uchunguzi kuhusu matukio hayo.
Mkuu wa Mkoa Awali Mkuu wa Mkoa wa Kaskazini Pemba, Omar Khamis Othman alipiga marufuku mikusanyiko ya watu katika nyakati za usiku ikiwa ni sehemu ya kujaribu kupambana na kupunguza vitendo vya hujuma alivyosema vimelenga kuvuruga uchaguzi wa marudio unaotazamiwa kufanyika Machi 20 mwaka huu.
“Tumepiga marufuku mikusanyiko ya vikundi vya watu katika nyakati za usiku ili kupambana na matukio ya hujuma yanayofanywa zaidi katika kipindi hiki kuelekea katika uchaguzi wa marudio, ambao baadhi ya watu wanataka kuvuruga kwa makusudi na kuzuia haki ya wapiga kura,” alisema.
Awali Naibu Katibu Mkuu wa CCM Zanzibar, Vuai Ali Vuai akizungumza kwa simu kutoka Pemba, alisema matukio hayo yamelenga kuhujumu na kutisha wananchi ambao ni wafuasi wa chama hicho, ili wasijitokeze kupiga kura katika uchaguzi wa marudio.
Akifafanua zaidi alisema matukio hayo yote yanaonesha waziwazi yamelenga wafuasi wa CCM kwa sababu hakuna mwanachama wa CUF, ambaye nyumba yake imeharibiwa na moto.
“Haya matukio yote yanaonesha wazi wazi kwamba ni sehemu ya vitendo vya hujuma kwa ajili ya kuwashambulia wafuasi wa CCM na kuwatisha ili wasijitokeze katika uchaguzi wa marudio’ alisema.
Vuai aliwataka wafuasi wa CCM kuwa watulivu katika kipindi hichi kigumu na kuviachia vyombo vya dola kufanya kazi yake ya uchunguzi na kuwatia hatiani watuhumiwa wa matukio ya hujuma, ambayo hivi sasa yamekuwa yakijitokeza kwa wingi Pemba yakiwalenga zaidi wafuasi wa CCM.
Wananchi wa Zanzibar wapo katika matayarisho ya uchaguzi wa marudio unaotazamiwa kufanyika wiki ijayo Machi 20 mwaka huu, ambapo Tume ya Uchaguzi Zanzibar (Zec), tayari imeanza kutoa mafunzo kwa mawakala wa vyama vya siasa watakaosimamia uchaguzi wa marudio, ambao unafanyika baada ya kufutwa kwa Uchaguzi Mkuu wa Oktoba 25.

Yanga, Azam kazini leo

Mshambuliaji wa Yanga, Haruna Niyonzima.

YANGA na Azam kazi  leo. Wawakilishi hao wa Tanzania katika michuano ya kimataifa inayoandaliwa na Shirikisho la Soka Afrika (CAF), leo wanashuka viwanjani ugenini katika mashindano tofauti kusaka pointi.

Yanga itakuwa mgeni wa APR kwenye Uwanja wa Amahoro mjini Kigali, Rwanda huku Azam FC pia ikiwa mgeni wa Bidvest Wits kwenye Uwanja wa Bidvset nchini Afrika Kusini. Yanga, mabingwa wa Tanzania Bara, watashuka dimbani wakiwa na kumbukumbu ya kufungwa mabao 3-0 nchini humo walipokutana kwa mara ya kwanza na APR mwaka 1996.

APR yenye wachezaji wengi wa timu ya Taifa ya Rwanda sio timu ya kuidharau, kwani iliwahi kuitoa Yanga katika raundi ya kwanza ya michuano hiyo mwaka huo kwa jumla ya mabao 3-1 ikishinda 3-0 kwao na ule wa marudiano uliochezwa Dar es Salaam Yanga ikishinda bao 1-0. Timu hizo zimekuwa zikitambiana kupata ushindi kutokana na jinsi ambavyo kila mmoja amekuwa akifanya vizuri katika ligi yake.

Kocha wa Yanga, Hans Pluijm kabla ya kuwasili Rwanda, alisema atawaandaa wachezaji wake kisaikolojia na kimashindano kuhakikisha wanapata ushindi ugenini ili kutengeneza mazingira mazuri ya mchezo wa marudiano utakaochezwa baada ya wiki moja. Yanga ilivuka raundi hiyo baada ya kuitoa Cercle de Joachim ya Mauritius kwa jumla ya mabao 3-0.

Wakati huo huo, habari zilizopatikana kutoka Kigali, Rwanda jana zilisema kuwa kiungo nyota wa Yanga, Haruna Niyonzima amekuwa gumzo kubwa kuhusu mchezo huo. Niyonzima aliyejiunga na Yanga msimu wa mwaka 2011/12 akitokea APR ya Rwanda anaelezwa kuwa ni mchezaji anayependwa kuliko wote miongoni mwa mashabiki wa soka wa Kigali, Rwanda, hasa kuelekea mchezo wa leo.

Kwenye mazoezi ya Yanga yaliyofanyika juzi na jana, mashabiki walifurika uwanjani na gumzo kubwa likiwa ni Niyonzima. “Amepokelewa kwa shangwe sana na jana kwenye mazoezi yetu mashabiki walifurika sana kumuangalia, anapendwa sana hapa Kigali,” alisema Meneja wa Yanga, Hafidh Saleh.

Mbali na Niyonzima, mashabiki wa APR wamekuwa wakiulizia mara kwa mara taarifa za wachezaji kama vile Thabani Kamusoko, Donald Ngoma, Amis Tambwe na winga Simoni Msuva wanaowachukulia kama ni hatari kwao kuelekea mchezo huo.

”Wana taarifa za akina Ngoma, Tambwe, Kamusoko na Msuva ambao kwao wanawachukulia ni hatari sana kuelekea mechi hiyo, mazungumzo na maswali yao ni juu ya hawa jamaa, wameanza kuingiwa hofu hasa wakisikia habari juu ya viwango vyao,” alisema Saleh.

Saleh alisema kwamba wachezaji wote wako kwenye hali nzuri kuelekea mchezo huo isipokuwa kiungo Saidi Makapu anayesumbuliwa kifua na mafua. Wakati huo huo, akizungumzia mchezo huo Niyonzima alisema ana imani leo Yanga itaibuka na ushindi mnono.

“Anayekwambia mchezaji ana mapenzi na timu, huyo anakudanganya, nilicheza APR lakini kwa sasa nipo Yanga na ndipo kazini kwangu, siwezi kucheza kwa mapenzi kwenye mechi hiyo eti kwa sababu nilikuwa APR, nitaonesha uwezo wangu wote na nikipata nafasi ya kuwafunga nitawafunga,” alisema Niyonzima.

Hata hivyo, aliwaonya wachezaji wenzake kujituma kwani japo APR inaundwa na wachezaji wengi chipukizi kwa sasa ni timu nzuri inayoweza kufanya chochote kwenye mechi yoyote na hivyo haitakuwa mechi rahisi.

Kwa upande wa Azam FC wanakutana na Bidvest kwa mara ya kwanza, hivyo ni timu zisizofahamiana, lakini kila moja huenda ikacheza kwa tahadhari kutokana na kusomana mapema.
Wakati Azam FC ikianzia raundi hiyo ya kwanza, Bidvest Wits imefika hatua hiyo baada ya kuiondosha Light Stars ya Shelisheli kwa mabao 9-0, ikianza kwa kushinda ugenini 3-0 kabla ya kuichapa tena 6-0 nyumbani. Kocha Msaidizi wa Azam, FC Mario Marinica, alisema wameiona Bidvest Wits kwenye mechi kadhaa na wanajua mbinu wanazotumia na kwamba wanayo nafasi nzuri ya kuwatoa Wasauzi hao.

“Tunauchukulia mchezo huo kwa uzito mkubwa, hata wapinzani wetu nao tunawachukulia kwa uzito mkubwa, tayari tumeshawapeleleza kwenye mechi kadhaa, tunajua ubora wao na ni timu nzuri, ila sisi tuko kamili na tayari kucheza nao,” alisema.

Naye mshambuliaji wa Azam FC, Allan Wanga amesema kuwa anaweza kuifunga Bidvest Wits ya Afrika Kusini, endapo atapewa nafasi ya kucheza leo. Kwa mujibu wa tovuti ya Azam, Wanga anajipa matumaini hayo kutokana na kuijua vema Bidvest Wits baada ya kufanya majaribio ya wiki mbili Juni mwaka jana, kabla ya kutua Azam FC.

“Nilikuwa mwezi wa sita mwaka jana hapa Bidvest Wits nikafanya vizuri kwa wiki mbili kwa sababu walitaka kunisaini nikiwa El Merreikh tangu miaka miwili iliyopita baada ya mazoezi ikawa wamekubaliana na wakala wangu ili kunisajili, lakini wakati huo mama yangu (marehemu) alikuwa amezidiwa na ugonjwa na kibali changu cha kazi hapa kilikuwa hakijatoka,” alisema.
Nyota huyo wa kimataifa kutoka Kenya, alizungumzia aina ya soka wanalocheza Bidvest Wits na kudai kuwa timu hiyo haichezi soka la pasi kama zilivyo timu nyingine huko Afrika Kusini bali hucheza zaidi mipira mirefu.

Maambukizi ya Ukimwi bado juu

Wabunge Kamati ya Ukimwi wakiwa katika kikao cha kuzungumzia mambo mbalimbali yanayohusu Ukimwi Dar es Salaam jana.

 

MAKAMU Mwenyekiti wa Kamati ya Bunge inayoshughulikia masuala ya Ukimwi na dawa za kulevya Kanyasu John amesema kampeni ya masuala ya Ukimwi hivi sasa imepungua kasi japo maambukizi katika baadhi ya maeneo bado yapo juu.

John ambaye pia ni Mbunge wa Geita Mjini alisema jana wakati wa semina elekezi iliyokuwa ikitolewa na Mradi wa Kujengea Uwezo Wabunge na Watumishi, jijini Dar es Salaam. Alitaka kampeni hizo zilizoanzishwa na serikali zisilale bali kila mmoja ajitahidi kufanya uhamasishaji ili ugonjwa huo usiendelee kuenea kwa wale ambao hawajapata maambukizi.

Kwa upande mwingine alisema semina hiyo wanaipata kwa wakati kwa kuwa karibu asilimia 90 ya wabunge ni wapya, hivyo wanajengewa uwezo wa kamati hiyo na kuongeza kuwa walipoteuliwa kwenye kamati hiyo walijiona kama hawana majukumu makubwa ya kufanya, hivyo semina hiyo itapanua mawazo yao na kujua majukumu yao hasa ni yapi.

Alitaja baadhi ya mada walizofundishwa kuwa ni uanzishwaji wa sheria, utungaji wa sheria pamoja na wajibu wa kamati hiyo. Kwa upande wake Mtaalamu wa Ukimwi na Afya kutoka Shirika la Umoja wa Mataifa la Maendeleo (UNDP), Dk Bwijo Bwijo alisema kuwa tangu mgonjwa wa kwanza atambulike nchini miaka ya 1980 hadi leo kuna mafanikio na changamoto nyingi ambazo serikali inakabiliana nazo kwa lengo la kutokomeza ugonjwa huo.

Magufuli asitisha ulipaji madeni ya bil.900/- BOT

Rais John Magufuli akiagana na Waziri wa Fedha na Mipango, Dk Philip Mpango baada ya kufanya ziara ya kushtukiza katika Makao Makuu ya Benki Kuu ya Tanzania (BOT), jijini Dar es Salaam jana. Kushoto ni Gavana wa Benki hiyo, Profesa Benno Ndulu. 

RAIS John Magufuli amefanya ziara ya kushtukiza katika Benki Kuu ya Tanzania (BoT), ambako pamoja na mambo mengine, ameiagiza isitishe mara moja ulipaji wa malimbikizo ya malipo yaliyokwishaidhinishwa ya zaidi ya Sh bilioni 900, badala yake yarejeshwe Wizara ya Fedha na Mipango kwa ajili ya kufanyiwa uhakiki

Aidha, amemuagiza Gavana wa Benki Kuu ya Tanzania, Profesa Beno Ndulu kupitia upya orodha ya wafanyakazi wa benki hiyo na kuwaondoa mara moja wale wote am bao hawana ulazima wa kuwapo.
Vilevile ameagiza Kitengo cha Madeni ya Nje ambacho awali kilikuwa chini ya Benki Kuu na baadaye kikahamishiwa Wizara ya Fedha, kirejeshwe BoT mara moja kuimarisha udhibiti wa ukopaji na ulipaji wa madeni.

Rais alitoa maagizo hayo jana wakati akizungumza na watendaji wakuu wa Benki wakiwemo, Gavana, Naibu Magavana, Wakurugenzi na Mameneja. Kuhusu ulipaji wa malimbikizo ya malipo, wakati Rais Magufuli akisitisha, tayari BoT ilikuwa katika mchakato wa kufanya malipo ya Sh bilioni 925.6, ambazo Wizara ya Fedha ilitoa idhini yafanyike.

Magufuli ameitaka Wizara ya Fedha ifanye upya uhakiki wa malipo hayo, kubaini kama walengwa walioidhinishwa kulipwa wanastahili kuyapata au la. Kwa upande wa wafanyakazi, Rais Magufuli amemuagiza Gavana wa BoT, Profesa Beno Ndulu kupitia upya orodha ya wafanyakazi wa benki hiyo na kuwaondoa mara moja wote ambao hawana ulazima wa kuwa wafanyakazi katika benki hiyo.
“Haiwezekani tukawa na kundi kubwa la wafanyakazi, wanalipwa mishahara wakati hata kazi wanazofanya hazijulikani,” alisema Magufuli. BoT imetajwa kuwa ina wafanyakazi 1,391.

Wakati Rais Magufuli akitoa agizo hilo la kutaka orodha ya wafanyakazi ipitiwe upya, Benki hiyo imekuwa ikituhumiwa kuajiri watoto wengi wa vigogo, jambo ambalo liliwahi kuibua mjadala kwenye mitandao ya kijamii, huku baadhi ya majina ya vigogo hao yakiwekwa hadharani.
Wakati huo huo, Rais ameagiza Kitengo cha Madeni ya Nje ambacho awali kilikuwa chini ya Benki Kuu na baadaye kikahamishiwa Wizara ya Fedha, kirejeshwe BoT mara moja kuimarisha udhibiti wa ukopaji na ulipaji wa madeni.

JELA MIAKA 7 KWA KUMKATA MKEWE SEHEMU ZA SIRI

 

MKAZI wa kata ya Mbugani mjini Tabora, Mashaka Maziku (60) amehukumiwa kwenda jela miaka saba baada ya kupatikana na hatia ya kumkata mkewe sehemu za siri kwa imani za kishirikina ili ajipatie mali.

Aidha, Maziku na mshirika wake ambaye ni mganga wa kienyeji, Kahele Paul, wamehukumiwa kifungo cha miaka mitano kwa kula njama ya kutenda kosa. Walihukumiwa jana na Hakimu Mkazi wa Mahakama ya Mkoa wa Tabora, Jackton Rushwela baada ya kuridhika na ushahidi uliotolewa na upande wa mashitaka.

Hakimu Rushwela alisema anamhukumu Maziku kwenda jela miaka saba, iwe fundisho kwa wananchi wengine wanaokuwa na tamaa ya kujipatia mali kwa njia za kishirikina huku wakiwasababishia madhara watu wengine.

Kwa mujibu wa hati ya mashitaka iliyosomwa na Wakili wa Serikali, Idd Mgeni, washtakiwa walitenda makosa hayo mwaka juzi, kati ya Oktoba 29 na Novemba 2 katika eneo la Kazaroho kata ya Mbugani mjini Tabora.

Ilidaiwa kwamba Maziku aliambiwa na mganga wa kienyeji ambaye ni mshtakiwa wa pili , kwamba akipeleka sehemu za siri za mkewe atapata Sh milioni tano. Mahakama ilielezwa kwamba, Maziku baada ya ushauri huo huku akiwa na tamaa ya kujipatia mali, alimchukua mkewe (jina tunalihifadhi) na kwenda kumnywesha pombe kabla ya kutimiza ukatili huo.

Katika kesi hiyo, upande wa mashitaka ulileta mashahidi wanne ambao waliiambia Mahakama kwamba mshtakiwa baada ya kumnywesha pombe nyingi mkewe alichukua kisu na kumkata sehemu za siri na kuzihifadhi kwenye mfuko wa suruali yake na akatoweka.

Walibainisha kuwa mama huyo alikuwa akipiga kelele kutokana na maumivu makali aliyopata huku akivuja damu nyingi na aliokolewa na majirani na kumpeleka hospitali ya mkoa kwa matibabu.
Maziku baada ya kukamatwa na kuhojiwa, alikana akidai kwamba yeye aliondoka na kumwacha mkewe akiwa ni mzima, lakini ulipofanyika upekuzi, nyama ya nyeti hizo zilikutwa kwenye mfuko wa suruali yake.
Upande wa mashitaka uliiomba mahakama itoe adhabu kali kwa washitakiwa, kwani vitendo vya ukatili vya aina hiyo kwa ajili ya kujipatia mali, vimekuwa vinawasababishia madhara watu wasiokuwa na hatia.

Matokeo ya Twiga Stars vs Zimbabwe yana funzo kubwa

Wachezaji wa timu ya taifa ya wanawake ya Twiga Stars wakipiga jalamba wakati wa mazoezi ya timu hiyo

 

 

NI dhahiri sasa Ligi Kuu ya soka ya wanawake inahitajika kwa udi na uvumba, hii ni kufuatia namna ambavyo timu ya soka ya wanawake ya Taifa ‘Twiga Stars’ ilivyocheza dhidi ya Zimbabwe na mambo yaliyopo nyuma ya pazia ya kiwango chao.

Twiga Stars walichabangwa mabao 2-1 pale kwenye Uwanja wa Azam Complex, Chamazi nje kidogo ya jiji la Dar es Salaam, mbele ya Watanzania kwa mamia waliojitokeza kuwashangilia kwenye mchezo huo wa awali wa kuwania nafasi ya kushiriki fainali za Mataifa ya Afrika (AFCON).
Wakicheza bila maelewano na kuonekana kutokuwa na mpango mahususi wa mechi, Twiga ‘walibahatisha’ kupata bao la kuongoza na kushindwa hata kulilinda kwa dakika tano mbele, kwani ndani ya dakika mbili Wazimbabwe walilikomboa na kipindi cha pili kuongeza la ushindi.

Tofauti ya Kiwango Kulikuwa na tofauti ya dhahiri kutoka kwenye timu zote mbili ambazo zilihusisha namna ya kucheza na wachezaji wa pande zote mbili. Twiga Stars walionekana wachovu, wasio na nguvu wala mipango mara baada ya dakika 25 za mwanzo za mchezo. Hii ni dhahiri kwamba aidha hawakuwa na mazoezi ya kutosha kuwafanya wahimili walau hata dakika 45 za kipindi cha kwanza.

Inaonekana kwenye mazoezi yao mwalimu hakutilia maanani sana au kwa kiwango kinachotakiwa mazoezi ya utimamu wa mwili. Hili lilisababisha timu kucheza kwa kiwango cha chini sana kulinganisha na kipindi cha mwalimu aliyejiuzulu Rogasian Kaijage. Inawezekana bado hali ya sintofahamu ambayo ilimfanya Kaijage ajiondoe kundini bado ipo kwenye hii timu, lakini hili mwalimu alikuwa analijua wakati anapokea timu na uzuri ni kwamba yeye alikuwa sehemu ya benchi la ufundi la Kaijage.

Inavyoonekana ameshindwa hata kuiga tu kile ambacho ‘bosi’ wake alikuwa anakifanya wakati ule kuifanya timu icheze vizuri na kwa nguvu muda wote. Kukosa pumzi kabisa Kukosa nguvu na pumzi kwa wachezaji kulifanya Twiga isiwe na ‘timu’ kiwanjani na Zimbabwe kuonekana ina timu nzuri na kutuhimili kwa kipindi chote cha dakika 90.

Ingawa ukizichambua timu zote mbili kwa wachezaji mmoja mmoja utaona kwamba kiufundi wachezaji wa Twiga walikuwa wazuri kuliko wale wa Zimbabwe, lakini ilionekana dhahiri kwamba wanategemea uwezo wa mtu binafsi kuliko muunganiko wa kitimu. Zimbabwe wao walionekana imara muda wote na wenye maandalizi ya kutosha, lakini zaidi walionekana kujua nini mahitaji yao kwenye mchezo ule na kucheza kitimu zaidi kuliko uwezo binafsi.

Walikuwa wengi kwenye kujilinda na hata wakati wa kushambulia pia kujilinda pia na kuwanyima Twiga Stars nafasi ya kuleta madhara. Zaidi ya lile bao ambalo Twiga walipata baada ya Zimbabwe kuzubaa na kuruhusu hali ya mmoja kwa moja kiwanjani, ambapo Mwanahamisi Omar aliwazidi mbio na kufunga, hawakutoa tena nafasi kama hiyo. Walihakikisha kila mara wanawazidi Twiga kwa idadi ili kupata faida ya namba ‘Numerical advantage’ iwe kwenye kujilinda ama kushambulia.
Kwa kuwa Twiga wao hawakuwa na mfumo wala mpango wa mechi, walikubali hili litokee na kila walipokwenda kushambulia walikuwa pungufu kwa idadi na mara nyingi kama sio zote walikuwa washambuliaji wawili Asha Rashidi na Mwanahamisi Omar dhidi ya mabeki wanne au watano wa Zimbabwe.

Majipu elimu watafuna Sh bilioni 63

Waziri wa Elimu, Sayansi, Teknolojia na Ufundi, Profesa Joyce Ndalichako

WAZIRI wa Elimu, Sayansi, Teknolojia na Ufundi, Profesa Joyce Ndalichako amewataka maofisa elimu wa wilaya na mikoa waliokula Sh bilioni 63 za ujenzi wa madarasa na matundu ya vyoo, wazirudishe la sivyo zitawatokea puani.

Pia amesema atapangua walimu waliorundikana kwenye shule moja ili kuwe na uwiano sawa kwa nia ya kutatua tatizo la uhaba mkubwa wa walimu kwenye baadhi ya shule. Alisema hayo jana mjini hapa, wakati akifunga mkutano wa maofisa elimu wa mikoa na wilaya nchi nzima.

“Tutaanza na shule ambazo hali ni mbaya, baadhi ya shule zina miaka hata mitatu bila kupata walimu wapya licha ya kuwa walimu wamekuwa wakipangwa lakini hawaendi huko. “Kwenye shule moja utakuta somo moja lina walimu sita lakini shule nyingine hakuna hata mwalimu mmoja wa somo hilo hilo, hatutakubali,” alisema.

Alisema kuna mpango wa kupangua walimu ili waende maeneo yenye upungufu mkubwa ni moja ya njia ya kuboresha upatikanaji wa elimu bora. Kuhusu Sh bilioni 63 za ujenzi wa madarasa na matundu ya vyoo zilizoliwa, alisema mwaka jana fedha zilitolewa kwa ajili ya ujenzi na uboreshaji wa miundombinu, lakini katika baadhi ya ofisi za elimu walikopewa fedha hizo, zililiwa.

“Mliokula fedha mrudishe, hatuwezi kuzuia watu wenye ubinafsi waendelee kuharibu elimu nchini. “Kuna watu darasa moja la shule ya msingi limekarabatiwa kwa Sh milioni 60, matundu ya vyoo hakuna, kila mmoja tutamsimamisha atoe maelezo kama una busara urudi na ukajitathimini,” alisema.

Alisema Jumatatu atapeleka barua kwa wakuu wa mikoa na wilaya, ili wasimamie fedha zote zilizopelekwa kwenye shule ili zifanye kazi iliyokusudiwa. “Ndugu zangu cha mtu sumu kitakutokea puani, mkarudishe fedha kama kuna mtu ametafuna, kama una kiwanja bora ukauze ili hiyo fedha ikafanye kazi iliyokusudiwa.

“Leo tunaongea ni marafiki lakini usipozingatia hili, si mnajua fedha zilizokuja Novemba tulipeleka mikoa yote muwe waangalifu sana,” alisema. Aliwataka maofisa elimu kuwa kiungo muhimu kati ya walimu, wazazi na jamii inayozunguka kwani elimu bora haiwezi kutolewa kama wazazi na jamii hawatoi ushirikiano.

“Usimamizi ni pamoja na kuangalia kunakuwa na mazingira rafiki katika utoaji wa elimu,” alisema. Pia alisema amekuwa akishangazwa na kitendo cha maofisa hao kujilipa fedha nyingi kwa ajili ya mafunzo, huku watoto wananyeshewa mvua.

“Mtu bila aibu anaweka Sh milioni nne kwa mafunzo ya mtu moja, tuwe na aibu kidogo kama hamna mtafute mahali mkaazime. “Ni kitu gani kinafundishwa kwa siku nne kwa Sh milioni 4 mtu mmoja milioni moja, sasa safari zote zinafutwa fedha zinakwenda kujenga madarasa,” alisema.

Alisema kuna hela kidogo zitapelekwa kwa ajili ya ujenzi wa madarasa na kipaumbele ni kuwatoa watoto nje wakae ndani kwenye madawati. “Kila mtu anayeitakia mema Sera ya Elimu ni kuweka kipaumbele, tumekuwa wabinafsi sana, mtu anafikiria atapata nini kwanza... huu ni wakati wa kutumikia wananchi ili elimu yetu isimame na ipate heshima,” alisema.

Alisema maeneo yote ya mafunzo ya kujenga uwezo, yatatakiwa yasimame ili fedha ziweze kwenda kujenga na kuimarisha miundombinu. Alisema mwaka huu kwenye elimu lazima kufunga mkanda ili kilio cha kuwatoa watoto katika mazingira ambayo hayapendezi kimalizwe. Mwenyekiti wa Umoja wa Maofisa Elimu wa Mikoa na Wilaya (REDEOA), Juma Kaponda alipendekeza mitihani ya kidato cha nne na maarifa irudi mwezi Oktoba.

Vijiji 356 vya Sengerema kuunganishiwa umeme

Waziri wa Nishati na Madini, Profesa Sospeter Muhongo.

 

VIJIJI 356 wilayani Sengerema vitaunganishiwa umeme baada ya kuingizwa kwenye awamu ya pili ya mradi wa Wakala wa Usambazaji Umeme Vijijini (REA), imeelezwa.

Naibu Waziri wa Nishati na Madini, Dk Medard Kalemani alisema hivyo jana wakati akizungumza na wakazi wa Bondo wilayani humo alipofanya ziara kukagua miradi ya umeme iliyo chini ya wakala huo.

Alisema, Serikali imejipanga kuhakikisha wananchi katika maeneo hayo wanapata umeme wa uhakika. “Vijiji 356 vitaunganishiwa umeme kupitia REA, kazi yetu ni kuwapatia huduma hiyo na wananchi wanapaswa kujua kuwa atakayekataa kuutumia wakati ameunganishiwa atafikishwa mahakamani,” Dk Kalemani alisema na kusababisha waliokuwa wakimsikiliza kufurahi kwa vicheko.

Aliwataka viongozi wa kata hiyo na Halmashauri kuhakikisha wanatumia fedha za mapato kutatua matatizo ikiwemo uhaba wa madawati. “Suala la madawati sio lazima mlipeleke Serikali Kuu, liko ndani ya uwezo wenu hivyo msilifanyie mzaha. Kila mtu anapaswa kushiriki kutoa mchango wa hali na mali,” alisema.

Sudan Kusini yatakiwa kuimarisha usalama

Rais wa Sudan Kusini, Salva Kiir.

 

BUNGE la Afrika Mashariki (EALA), limemtaka mwanachama mpya wa Jumuiya ya Afrika Mashariki, Sudan Kusini kusaini haraka mkataba wa kutawazwa kuwa mwanachama kamili na kuhakikisha anaimarisha amani na usalama ndani ya mipaka yake.

Aidha, Watanzania wametakiwa kuchangamkia fursa ya mwanachama huyo mpya kwa kufanya biashara na kuongeza masoko. Wakipitisha azimio la kuipongeza Sudan Kusini baada ya hoja iliyotolewa na Mbunge Peter Mathuki (Kenya) na kuungwa mkono na Mbunge Dora Byamukama (Uganda), wabunge hao wamepongeza hatua hiyo na kusema itasaidia kuongeza soko la jumuiya.
Mkutano wa wakuu wa nchi wanachama wa Jumuiya ya Afrika Mashariki waliokutana wiki iliyopita mjini Arusha, walipokea taarifa ya Baraza la Mawaziri wa EAC na kuikubalia Sudan Kusini kuwa mwanachama. Akiwasilisha hoja, Mathuki alisema hatua ya Sudan Kusini kujiunga na EAC kutasaidia kupanuka na kuongeza uwezo wa umoja wa kanda yenye wananchi wapatao milioni 160.
Pia itasaidia kukuza biashara na maendeleo ya uchumi kwa ujumla hasa katika kuelekea kujenga Umoja wa Afrika. Akichangia hoja, Mbunge Shyrose Bhanji (Tanzania) alitoa mwito kwa Serikali ya Sudan Kusini kuhakikisha amani na usalama wa raia wake wote ili waweze kuvuna faida za utengamano.

“Ni vyema mwananchi wa EAC, hususan wa Tanzania kutumia fursa za Sudan Kusini ambao ni wazalishaji wa mafuta kwa kufanya biashara na kupanua masoko,” alisema. Naye Mathuki aliwapongeza wakuu wa EAC kwa kuiingiza Sudan Kusini katika muda muafaka na kusisitiza kuwa ni muhimu kwa mwanachama huyo mpya kuzingatia kanuni zote za mkataba wa EAC.

“Kwa Sudan Kusini kujiunga na jumuiya kuna manufaa makubwa kwa umoja huo,” alisema Dora Byamukama na kutolea mfano maeneo ya rutuba na yenye utajiri ambao ni muhimu kwa mchakato wa utengamano.
Mbunge Judith Pareno (Kenya) alisema kuingia kwa Sudan Kusini katika EAC ni ishara ya muungano wa familia hiyo iliyokuwa imetengwa kutokana na mipaka ya wakoloni. Naye Hafsa Mossi (Burundi) alipongeza uongozi wa Sudan Kusini kwa kuwa na mawazo na kufanya bidii kujiunga na EAC mara baada ya kupata uhuru.

“Hakuna muda bora kwao (Sudan Kusini) kujiunga na EAC. Nimefurahi sana kuona maendeleo ambayo ni dhahiri yataongeza thamani ya jumuiya”, alisema. Alisema kuwa jumuiya imeonesha dhamira yake ya dhati ya kuleta amani na hivi karibuni yalisainiwa makubaliano ya kuihakikishia Sudan Kusini yaliyosainiwa Tanzania.

Naye Abubakar Ogle (Kenya) alisema ni muhimu kwa EAC kuzingatia kanuni zote ikiwa ni pamoja na utawala wa sheria na utawala bora katika kipindi chote. “Tusibaki kujikita katika kuangalia namna ya kukuza masoko na kukuza uchumi, lazima kuzingatia utawala wa sheria na utawala bora, tusipofanya hivi umoja huu utabaki kuwa wa kutatua mgogoro,” alisema.

Katibu Mkuu wa EAC, Balozi Richard Sezibera alisema Sudan Kusini waliomba kujiunga na EAC katika msingi wa mchakato wa kuingizwa kuharakishwa na kwamba uwezo wa nchi ulikwenda mbali zaidi ya uhakiki. “Tumefanya kazi pamoja katika kuimarisha uwezo katika masuala mbalimbali yakiwemo masuala ya ukusanyaji mapato na utawala wa forodha,” alisema.

Rais apongezwa kwa ahadi Sengerema

Rais Dk John Magufuli.

 

MBUNGE wa Sengerema, William Ngeleja, amempongeza Rais John Magufuli kwa kuanza kutekeleza ahadi yake ya ujenzi wa daraja la kisasa kwenye kivuko cha Kigongo –Busisi lenye urefu wa mita 3,200 wilayani Sengerema.

Alitoa pongezi hizo jana wilayani humo, alipozungumza na wanahabari kuhusu utekelezaji wa ahadi za Rais alizozitoa wakati wa kampeni ya Uchaguzi Mkuu. Alisema, Rais ametoa Sh milioni 700 zitakazotumiwa na Mkandarasi Mshauri kufanya upembuzi yakinifu kwa ajili ya ujenzi wa daraja hilo, ambalo kwa mujibu wake litakuwa ni la kwanza na la aina yake kuwahi kujengwa kwa nchi za Kusini mwa Jangwa la Sahara.

“ Kwa niaba ya wananchi wa Sengerema nachukua fursa hii kumpongeza kwa dhati Rais wetu kwa kuanza kutekeleza moja ya ahadi muhimu aliyowaahidi wananchi wa Sengerema ya ujenzi wa daraja la kisasa kwenye kivuko cha Kigongo- Busisi,” Ngeleja alisema.

Alisema, Serikali imekwishatangaza zabuni ya kuanza kufanya upembuzi yakinifu kwa ajili ya ujenzi wa daraja hilo, jambo lililowapa faraja wakazi wa Sengerema na mikoa ya jirani. Alisema, daraja hilo litakapokamilika litaharakisha shughuli za maendeleo ikiwa ni pamoja na kusaidia kukuza uchumi wa wananchi na kuondokana na umasikini wa kipato.

Lukuvi aagiza watumishi Monduli kufikishwa kortini

Waziri wa Ardhi, Nyumba na Maendeleo ya Makazi, William Lukuvi.

 

WAZIRI wa Ardhi, Nyumba na Maendeleo ya Makazi, William Lukuvi ameagiza watumishi watatu wa Idara ya Ardhi katika Halmashauri ya wilaya ya Monduli, kupandishwa kizimbani kutokana na tuhuma za wizi wa fedha za halmashauri hiyo.
Wanadaiwa kuuza viwanja zaidi ya 200 kati ya Sh milioni mbili hadi nne bila kuingiza fedha hizo katika akaunti ya halmashauri hiyo. Lukuvi alitoa agizo hilo juzi mbele ya Mkuu wa Wilaya ya Monduli, Francis Miti kwenye mkutano wa hadhara wakati wa ziara yake wilayani humo, baada wananchi kutoa malalamiko yao ya kuuziwa viwanja hewa na watumishi wa halmashauri.

Watumishi wanaotuhumiwa ni Ofisa Ardhi Mteule wa wilaya hiyo, Kitundu Mkumbo ambaye ni Mpimaji wa ardhi , Leonard Haule pamoja na Mchora Ramani, Leonard Mkwavi. Lukuvi alisema kuwasimamisha kazi watumishi hao haitoshi hivyo ni vyema wakafikishwa mahakamani kwa kukiuka maadili ya watumishi wa umma pamoja na kurudisha fedha zote za wananchi hao waliowatapeli kwani wanalipa stakabadhi za halmashauri.

Aidha aliagiza ofisi ya Kuzuia na Kupambana na Rushwa (Takukuru) kwa kushirikiana na polisi katika wilaya hiyo, kufanya uchunguzi wa haraka na wa kina kisha kuwafikisha mahakamani watumishi hao.

Akipokea maagizo hayo, Mkuu huyo wa wilaya alisema baada ya kutambua ubadhirifu huo aliagiza watumishi hao kuwekwa ndani kwa saa 24 pamoja na kuwasimamisha kazi. Alisema uchunguzi huo umeshaanza na kwamba uchunguzi ukikamilika watafikishwa mahakamani mara moja.
Wakati huo huo, Mwenyekiti wa Chama Cha Mapinduzi (CCM ) wilaya ya Monduli, Loota Sanare alimuomba waziri kufikisha ombi lao kwa Rais Dk John Magufuli kufuta hati za mashamba 39 ambayo yapo katika wilaya hiyo lakini wawekezaji wanayoyamiliki hawayaendelezi.
Akiwa wilayani humo, Lukuvi alikabidhi mashamba makubwa 13 kwa wananchi wa wilaya hiyo ambayo Rais Magufuli aliyafutia hati kutokana na wamiliki kutoyaendeleza kwa muda mrefu.

RC awaweka kikaangoni wakurugenzi Siha, Hai

Mkuu wa Mkoa wa Kilimanjaro, Amos Makalla.

 

MKUU wa Mkoa wa Kilimanjaro, Amos Makalla amewaonya wakurugenzi wa halmashauri za wilaya za Hai na Siha kutokana na madai ya kuandaa takwimu za uongo kuhusu upungufu wa madawati kwa shule za msingi na sekondari.

Aidha Makalla aliwataka wakurugenzi wa halmashauri kumpa taarifa za maandishi kuhusu mahitaji ya madawati, yaliyopo kwa sasa na upungufu uliopo. Akizungumza na Mkuu wa Wilaya ya Siha, Dk Charles Mlingwa na Kaimu Mkurugenzi wa Halmashauri hiyo, Moses Jonas, Makalla alisema viongozi wa wilaya hizo wanafanya upotoshaji kuficha upungufu uliopo, jambo alilosema litawagharimu.

“DC umepata ujumbe wangu kuhusu madawati? Fanyia kazi haraka, nimetaka takwimu za madawati zaidi ya mara tano mnanipiga chenga, sasa natoa saa saba mnipe maandishi kama hakuna upungufu mnieleze...ili mkinidanganya mtakuwa mmejifukuzisha kazi,” alisema.
Aidha Mkuu wa Mkoa alielezea kushangazwa na taarifa za Mkurugenzi wa Wilaya ya Hai, Said Mderu kwamba hawana upungufu wa madawati licha ya mkuu wa wilaya hiyo, Anthony Mtaka kueleza jinsi ya kukabili upungufu uliopo.

“Wakati naongea na Mtaka amenieleza wanapambana kupata madawati huku mkurugenzi ananieleza hawana upungufu kwa shule za msingi na sekondari jambo ambalo linatia shaka,” alisema.
Alisema taarifa za uongo zitawagharimu viongozi hao wakati viongozi wa kitaifa, hususan mawaziri, Waziri Mkuu au Rais watakapowatembelea. “Hizi taarifa zenu za kupika zitawagharimu pale atakapokuja waziri kisha azungumze na wananchi ambao wataeleza hali halisi ikiwamo baadhi ya wanafunzi kukalia ndoo darasani... semeni kweli maana upungufu huo ni matokeo chanya ya elimu bure,” alisema.

Januari mwaka huu, Makalla alitaja wilaya ambazo zina upungufu wa madawati na idadi yake kwenye mabano ni wilaya ya Mwanga (867), Same( 592) na Siha (282) .